Зи лезги ч1ал

ЗИ ЛЕЗГИ ЧIAЛ

Зи лезги ч1ал, захъ авай са багьади,

Чуьхуьзва за жуван руьгь ви нурара.

Дидедин мез, играмиди, алади,

Тухузвайди уьмуьрдин зун гурарай.

Эминанни Сулейманан саз я вун,

Лезги чилин абурни я, наз я вун.

Мярекат я, берекат я лезги ч1ал,

Зи чан, намус, гьерекат я лезги ч1ал.

Дегьзаманрин суьрет я вун, лезги ч1ал,

Чи илгьамдин девлет я вун, лезги ч1ал.

Вичи хвейи зи халкь шумуд женгера

Чун агудай Шарвилидин сес я вун.

Акъудай чун шумудни-са к1еверай

Ивидин ц1ай, йикъан нур, гьевес я вун.

Масан зи ч1ал, асиррин рехъ ат1айди,

Авазва вун чи гьар садан нефесда.

Агъзур жуьре гафар гваз чал атайди,

Ви рангар гьич са ч1алани эвездач.

Абдул Фетягь